Արգեմոնե սպիտակ - Аргемоне белый - Argemone Alba

Միամյա ծաղկաբույս է, 60-80 սմ բարձրությամբ: Տերևները պարզ են, խոր կտրտված բլթակներով, որոնք իրենց հերթին կտրտված են, սուր ծայրերով: Ամբողջ բույսը ծածկված է մազմզուկներով: Տերևադասավորությունը հերթադիր է: Ծաղիկը բաղկացած է 6 պսակաթերթիկներից, առէջները շատ են:

Վարսանդը մեկն է`3 սռնականի: Ծաղիկների գույնը մեծ մասամբ սպիտակ է, սակայն հանդիպում են նաև նարնջագույն, կարմիր և կարմրանարնջագույն ծաղիկներ, որոնց տրամագիծը հասնում է մինչև 8 սմ-ի: Պատկանում է կակաչազգիների ընտանիքին:

Հայրենիքը Հյուսիսային Ամերիկան է: Մշակության մեջ տարածված է Արևմտյան Եվրոպայում, Միջերկրական ծովի ավազանում:

Սպիտակ արգեմոնեն ծաղկում է հունիս ամսից մինչև ուշ աշուն:

Պահանջկոտ է  հողային պայմանների, խոնավության և լույսի նկատմամբ: Բավականին ջերմասեր է: Պիտանի է միքսբորդերների, ծաղկաթմբերի և պարտերային ձևավորումների համար, ծաղկային օջախաներում` գազոնի ֆոնի վրա:

Արգեմոնե ցեղը ընդգրկում է 10 տեսակ, որոնք միամյա են կամ երկամյա և մեծ հետաքրքրություն են ներկայացնում ծաղկադեկորատիվ ձևավորումների համար:        

Հարցեր, պատասխաններ, մեկնաբանություններ